ᱱᱟᱹᱭ

ᱱᱚᱶᱟ ᱫᱷᱟᱹᱨᱛᱤ ᱨᱮ ᱜᱚᱴᱟ ᱯᱟᱲᱟ ᱱᱟᱹᱭ ᱟᱨᱹᱭ ᱜᱮ ᱧᱮᱞ ᱢᱮ᱾ ᱜᱚᱴᱟ ᱯᱟᱲᱟ ᱪᱮᱦᱮᱞ ᱪᱮᱯᱮᱞ, ᱪᱷᱟᱹᱯᱤᱞ ᱢᱟᱱ ᱞᱤᱸᱜᱤᱜ ᱠᱟᱱᱟ᱾ ᱚᱱᱟ ᱨᱮ ᱛᱤᱱᱟᱹᱜ ᱦᱚᱲ ᱠᱚ ᱟᱹᱛᱩᱜ ᱠᱟᱱᱟ ᱟᱨ ᱛᱤᱱᱟᱹᱜ ᱦᱚᱲ ᱠᱚ ᱵᱚᱦᱮᱞᱚᱜ ᱠᱟᱱᱟ᱾ ᱪᱟᱸᱫᱚ ᱵᱚᱸᱜᱟ ᱟᱜ ᱥᱤᱨᱡᱟᱹᱣ ᱢᱚᱞᱚᱝ ᱞᱟᱛᱟᱨ ᱨᱮ ᱡᱩᱨᱩᱞ ᱡᱩᱨᱩᱞ ᱡᱩᱞᱩᱜ ᱠᱟᱱᱟ ᱟᱨ ᱠᱷᱟᱹᱯᱨᱤ ᱵᱷᱤᱛᱨᱤ ᱨᱮᱦᱚᱸ ᱛᱚ ᱚᱱᱠᱟᱱ ᱡᱤᱱᱤᱥ ᱛᱮᱜᱮ ᱛᱚᱵᱮᱫ ᱯᱮᱨᱮᱡ ᱟᱠᱟᱱᱟᱼᱚᱱᱟ ᱨᱮᱱᱟᱜ ᱥᱚᱦᱚᱫ ᱛᱮ ᱪᱮᱫᱟᱜ ᱜᱚᱴᱟ ᱯᱟᱲᱟ ᱱᱟᱹᱭ ᱜᱮ ᱵᱟᱢ ᱧᱮᱞ ᱧᱟᱢᱟ, ᱡᱮᱞᱮᱠ ᱚᱠᱛᱚ ᱱᱟᱹᱭ ᱪᱮ ᱛᱟᱠ ᱱᱟᱹᱭ᱾ ᱚᱠᱛᱚ ᱪᱮ ᱥᱚᱢᱚᱭ ᱢᱤᱫ ᱮᱱᱟ ᱯᱟᱨᱚᱢ ᱪᱟᱞᱟᱜ ᱠᱟᱱᱟ᱾ ᱢᱮᱱᱠᱷᱟᱱ ᱟᱡᱟᱜ ᱠᱟᱹᱢᱤ ᱫᱚᱭ ᱠᱟᱹᱢᱤ ᱛᱚᱨᱟᱭᱮᱫ ᱜᱮᱭᱟ᱾ ᱚᱠᱟ ᱡᱚᱦᱚᱜ ᱟᱢᱟᱜ ᱚᱠᱟ ᱠᱟᱹᱢᱤ ᱩᱱ ᱡᱚᱦᱚᱜ ᱚᱱᱟ ᱠᱟᱹᱢᱤ ᱞᱚᱜᱚᱱ ᱛᱮᱜᱮ ᱠᱟᱹᱢᱤ ᱜᱚᱫᱽ ᱢᱮ᱾ ᱚᱠᱛᱚ ᱯᱟᱨᱚᱢ ᱞᱮᱱᱠᱷᱟᱱ ᱜᱟᱱᱚᱜ ᱪᱚ ᱵᱟᱝ ᱪᱚ ᱟᱨ ᱵᱟᱝ ᱠᱷᱟᱱ ᱵᱮᱜᱚᱲ ᱦᱚᱸ ᱛᱚ ᱵᱮᱜᱚᱲ ᱫᱟᱲᱮᱭᱟᱜᱼᱟ᱾ ᱥᱤᱧ ᱪᱟᱞᱟᱜ ᱠᱟᱱᱟ, ᱧᱤᱫᱟᱹ ᱦᱤᱡᱩᱜ ᱠᱟᱱᱟ, ᱧᱤᱫᱟᱹ ᱪᱟᱞᱟᱜ ᱠᱟᱱᱟ ᱥᱤᱧ ᱦᱤᱡᱩᱜ ᱠᱟᱱᱟ ᱱᱚᱶᱟ ᱦᱚᱸ ᱱᱟᱹᱭ ᱫᱟᱜ ᱞᱮᱠᱟᱜᱮ ᱞᱮᱛᱟᱲ ᱡᱩᱜᱽ ᱡᱩᱜᱽ ᱪᱟᱞᱟᱜ ᱠᱟᱱᱟ᱾ ᱥᱮᱨᱢᱟ ᱨᱮ ᱟᱨᱮ ᱜᱚᱴᱟᱝ ᱜᱚᱨᱦᱚ ᱢᱮᱱᱟᱜ ᱠᱚᱣᱟ᱾ ᱨᱟᱯᱟᱜᱽ ᱡᱚᱦᱚᱜ ᱪᱩᱱ ᱯᱚᱴᱚᱢ ᱦᱩᱨᱞᱟᱹ ᱟᱹᱪᱩᱨ ᱠᱮᱫ ᱞᱮᱠᱟ ᱛᱟᱭᱚᱢ ᱢᱟᱲᱟᱝ ᱠᱚ ᱦᱩᱞᱟᱹᱝ ᱟᱹᱪᱩᱨᱚᱜ ᱠᱟᱱᱟ ᱥᱤᱨᱤᱡᱽ ᱠᱷᱚᱱ ᱱᱮᱛᱟᱨ ᱦᱟᱹᱵᱤᱡ ᱩᱱᱠᱩ ᱚᱱᱠᱟ ᱠᱚ ᱟᱹᱪᱩᱨᱚᱜ ᱠᱟᱱ ᱜᱮᱭᱟ ᱟᱨ ᱦᱚᱸ ᱛᱤᱱᱟᱹᱝ ᱡᱩᱜᱽ ᱦᱟᱹᱵᱤᱡ ᱪᱚ ᱠᱚ ᱟᱹᱪᱩᱨᱚᱜᱼᱟ᱾ ᱚᱱᱟ ᱦᱚᱸ ᱵᱟᱝ ᱞᱟᱹᱭ ᱫᱟᱲᱮᱭᱟᱜᱼᱟ᱾ ᱚᱠᱟ ᱦᱚᱸ ᱵᱟᱝ ᱛᱟᱹᱯᱟᱺᱜᱤᱜ ᱠᱟᱱᱟ ᱟᱨ ᱚᱠᱟ ᱦᱚᱸ ᱵᱟᱝ ᱛᱟᱹᱯᱟᱹᱠᱤᱡᱚᱜ ᱠᱟᱱᱟ᱾ ᱪᱮᱫᱟᱜ ᱵᱟᱝᱢᱟ ᱛᱟᱠ ᱡᱟᱹᱱᱤᱡ ᱦᱩᱭᱩᱜ ᱠᱟᱱᱟ᱾ ᱟᱨᱦᱚᱸ ᱚᱱᱠᱟ ᱜᱮ ᱫᱟᱜ ᱡᱟᱹᱯᱩᱫ ᱨᱟᱵᱟᱝ ᱟᱨ ᱥᱤᱛᱩᱝ ᱚᱱᱟ ᱦᱚᱸ ᱛᱟᱠ ᱡᱟᱹᱱᱤ ᱜᱮ ᱦᱤᱡᱩᱜ ᱠᱟᱱᱟ᱾ ᱟᱛᱟᱠ ᱡᱟᱹᱱᱤ ᱜᱮ ᱤᱛᱟᱹ ᱛᱚᱯᱟᱜ ᱠᱟᱱᱟ, ᱛᱟᱠ ᱡᱟᱹᱱᱤ ᱜᱮ ᱫᱟᱨᱮ ᱠᱚ ᱨᱮᱱᱟᱜ ᱥᱟᱠᱟᱢ ᱧᱩᱨᱩᱜ ᱠᱟᱱᱟ ᱟᱨ ᱛᱟᱠ ᱡᱟᱹᱱᱤ ᱜᱮ ᱥᱟᱠᱟᱢ ᱦᱚᱸ ᱥᱟᱜᱮᱱᱚᱜ ᱠᱟᱱᱟ ᱪᱮ ᱢᱚᱦᱮᱸ ᱵᱟᱦᱟᱜ ᱠᱟᱱᱟ᱾ ᱚᱠᱛᱚ ᱥᱚᱢᱚᱭ ᱱᱟᱹᱭ ᱵᱟᱭ ᱛᱟᱺᱜ ᱜᱮᱭᱟ᱾ ᱛᱟᱠ ᱡᱟᱹᱱᱤ ᱵᱮᱨᱮᱫ ᱢᱮ ᱛᱟᱠ ᱡᱟᱹᱱᱤ ᱮᱵᱷᱮᱱᱚᱜ ᱢᱮ ᱟᱨ ᱛᱟᱠ ᱡᱟᱹᱱᱤ ᱜᱮ ᱠᱟᱹᱢᱤ ᱜᱚᱫᱽ ᱢᱮ᱾ ᱥᱚᱢᱚᱭ ᱱᱟᱹᱭ ᱨᱮᱱᱟᱜ ᱞᱩᱦᱩᱠ ᱡᱟᱹᱱᱤᱢ ᱠᱟᱹᱢᱤ ᱞᱮ ᱮᱱᱟᱝ ᱥᱚᱢᱚᱭ ᱫᱚ ᱥᱤᱨᱯᱟᱹᱭ ᱮᱢᱟᱼᱢᱟ᱾ ᱚᱠᱛᱚ ᱪᱤᱱᱦᱟᱹᱣ ᱦᱚᱲ ᱠᱚᱫᱚ ᱥᱚᱢᱚᱭ ᱡᱟᱹᱱᱤ ᱫᱷᱚᱱ ᱟᱨ ᱢᱟᱹᱱ ᱠᱚ ᱦᱟᱹᱨ ᱡᱚᱝᱼᱟ ᱟᱨ ᱥᱚᱢᱚᱭ ᱵᱟᱢ ᱪᱤᱱᱦᱟᱹᱣ ᱞᱮᱠᱷᱟᱱ, ᱟᱢ ᱦᱚᱦᱟᱜ ᱫᱚ ᱩᱱ ᱡᱚᱦᱚᱜ ᱩᱱᱠᱩ ᱧᱮᱞᱛᱮ ᱢᱮᱞᱮ ᱢᱮᱞᱮ ᱵᱷᱟᱲᱚ ᱠᱟᱜ ᱢᱮ ᱪᱚᱴ ᱥᱮᱫ ᱪᱟᱦᱟᱵ ᱠᱟᱜ ᱢᱮ ᱛᱳᱣᱟ ᱫᱟᱠᱟ ᱧᱩᱨ ᱟᱢᱟ᱾ ᱚᱱᱟ ᱜᱮᱠᱚ ᱢᱮᱱᱟ ᱛᱟᱠ ᱡᱟᱹᱱᱤ ᱵᱷᱟᱜᱽ ᱵᱟᱝᱠᱷᱟᱱ ᱫᱚ ᱯᱷᱟᱸᱠ᱾

     ᱠᱟᱹᱢᱤ ᱱᱟᱹᱭ ᱥᱮ ᱠᱟᱹᱢᱤ ᱱᱟᱹᱭᱟᱜ ᱠᱟᱛᱷᱟ ᱫᱚ ᱟᱞᱚᱢ ᱢᱮᱱ ᱠᱟᱜᱼᱟ᱾ ᱵᱮᱨᱮᱫ ᱛᱚᱨᱟ ᱥᱮᱛᱟᱜ ᱠᱷᱚᱱ ᱠᱟᱹᱢᱤ ᱪᱷᱩᱴᱟᱹᱣ ᱠᱚᱜ ᱢᱮ᱾ ᱦᱟᱱᱟ ᱥᱟᱵᱼᱥᱟᱵ, ᱱᱚᱶᱟ ᱥᱟᱵᱼᱥᱟᱵ, ᱛᱤᱼᱡᱟᱸᱜᱟ ᱢᱮᱫᱼᱢᱚᱪᱟ, ᱟᱞᱟᱝ ᱢᱤᱫ ᱮᱥᱟᱭ ᱠᱟᱹᱢᱤ ᱨᱮ ᱵᱟᱹᱭ ᱠᱚᱼᱟ᱾ ᱠᱟᱹᱢᱤ ᱥᱮ ᱢᱤᱫᱴᱟᱝᱼᱟ, ᱟᱨ ᱥᱮ ᱞᱮᱠᱷᱟ ᱛᱮ ᱪᱟᱵᱟᱜᱼᱟ ? ᱦᱩᱰᱤᱧ ᱠᱟᱹᱢᱤ ᱠᱷᱳᱱ ᱮᱦᱚᱵ ᱠᱟᱛᱮ ᱵᱩᱨᱩ ᱵᱟᱨᱟᱠ ᱢᱟᱨᱟᱝ ᱠᱟᱹᱢᱤ ᱢᱮᱱᱟᱜᱼᱟ᱾ ᱚᱱᱟ ᱦᱚᱸ ᱚᱲᱟᱜ ᱫᱩᱣᱟᱹᱨ ᱨᱮᱱᱟᱜ ᱠᱟᱹᱢᱤ ᱡᱚᱢᱼᱧᱩ ᱨᱮᱱᱟᱜ ᱠᱟᱹᱢᱤ ᱯᱮᱲᱟ ᱯᱟᱹᱦᱬᱟᱹ ᱨᱮᱱᱟᱜ ᱠᱟᱹᱢᱤ ᱟᱹᱛᱩ ᱫᱤᱥᱚᱢ ᱨᱮᱱᱟᱜ ᱠᱟᱹᱢᱤ ᱦᱚᱸᱛᱚ ᱢᱮᱱᱟᱜᱼᱟ᱾ ᱚᱱᱟ ᱵᱷᱮᱜᱮᱫ ᱥᱩᱠᱼᱫᱩᱠ ᱟᱨ ᱨᱟᱹᱥᱠᱟᱹ ᱨᱮᱱᱟᱜ ᱠᱟᱹᱢᱤ ᱦᱚᱸᱛᱚ ᱚᱱᱟ ᱥᱟᱶ ᱥᱟᱶᱛᱮ ᱛᱚᱸᱜᱮ ᱟᱠᱟᱱᱟ᱾ ᱱᱚᱶᱟ ᱠᱚ ᱠᱟᱹᱢᱤ ᱥᱩᱢᱩᱝ ᱦᱚᱸ ᱵᱟᱝᱼᱟ ᱟᱨᱦᱚᱸ ᱟᱹᱰᱤ ᱞᱮᱠᱟᱱ ᱠᱟᱹᱢᱤ ᱢᱮᱱᱟᱜ ᱜᱮᱭᱟ᱾ ᱚᱱᱟᱛᱮ ᱠᱟᱹᱢᱤ ᱠᱚ ᱫᱚ ᱠᱟᱹᱢᱤ ᱱᱟᱹᱭ ᱞᱮᱠᱟ ᱜᱮ ᱧᱮᱞᱚᱜᱼᱟ᱾ ᱱᱤᱛ ᱠᱟᱹᱢᱤ ᱢᱮ, ᱫᱷᱤᱱᱟᱹᱝ ᱠᱟᱹᱢᱤ ᱢᱮ, ᱛᱮᱦᱮᱧ ᱠᱟᱹᱢᱤ ᱢᱮ, ᱜᱟᱯᱟ ᱠᱟᱹᱢᱤ ᱢᱮ, ᱜᱟᱯᱟ ᱠᱟᱹᱢᱤ ᱢᱮ, ᱜᱟᱯᱟ ᱯᱟᱨᱚᱢ ᱞᱮᱱ ᱠᱷᱟᱱ ᱢᱮᱭᱟᱝ ᱦᱚᱸ ᱚᱱᱠᱟ ᱜᱮ ᱠᱟᱹᱢᱤ ᱢᱮ᱾ ᱫᱤᱱᱟᱹᱢ ᱠᱟᱹᱢᱤ ᱢᱮ ᱦᱟᱯᱛᱟᱼᱦᱟᱯᱛᱟ ᱠᱟᱹᱢᱤ ᱢᱮ, ᱪᱟᱸᱫᱚ ᱯᱤᱪᱷᱤ ᱠᱟᱹᱢᱤ ᱟᱠᱟ ᱛᱟᱦᱮᱱ ᱢᱮ᱾ ᱡᱩᱜᱽ ᱡᱩᱜᱽ ᱠᱟᱹᱢᱤ ᱱᱟᱹᱭ ᱫᱚ ᱞᱤᱸᱜᱤ ᱟᱠᱟ ᱛᱟᱦᱮᱱ ᱜᱮᱭᱟ᱾ ᱠᱟᱹᱢᱤ ᱱᱟᱹᱭᱨᱮ ᱩᱱᱩᱢᱚᱜ ᱢᱮ, ᱠᱟᱹᱢᱤ ᱱᱟᱹᱭᱨᱮ ᱰᱩᱵᱩᱡᱚᱜ ᱢᱮ ᱠᱟᱹᱢᱤ ᱱᱟᱹᱭᱨᱮ ᱪᱟᱯᱮᱜ ᱢᱮ, ᱠᱟᱹᱢᱤ ᱱᱟᱹᱭ ᱨᱮ ᱯᱟᱭᱨᱟᱜ ᱢᱮ᱾ ᱠᱟᱹᱢᱤ ᱫᱚ ᱵᱟᱝ ᱪᱟᱵᱟᱜᱼᱟ ᱟᱨ ᱛᱤᱥ ᱨᱦᱚᱸ ᱵᱟᱝ ᱠᱚᱢᱚᱜᱼᱟ᱾ ᱟᱢ ᱜᱮᱢ ᱞᱟᱸᱜᱟᱜᱼᱟ ᱟᱨ ᱟᱢ ᱜᱮᱢ ᱛᱷᱟᱠᱟᱣ ᱜᱚᱫᱚᱜᱼᱟ᱾ ᱛᱷᱟᱠᱟᱣ ᱵᱟᱲᱟ ᱞᱮᱱ ᱠᱷᱟᱱ ᱮᱢ ᱜᱚᱡ ᱠᱟᱠᱟᱲᱪᱟᱝ ᱜᱚᱫᱚᱜᱼᱟ᱾

     ᱠᱟᱹᱢᱤ ᱡᱚᱦᱚᱜ ᱜᱮ ᱠᱟᱹᱢᱤ ᱱᱟᱹᱭ ᱠᱟᱛᱟ ᱨᱮ ᱢᱤᱫ ᱵᱟᱨ ᱜᱚᱴᱟᱝ ᱠᱮᱴᱮᱡ ᱥᱟᱹᱦᱤᱸᱡ ᱠᱟᱹᱢᱤ ᱚᱴᱚ ᱠᱟᱜ ᱢᱮ᱾ ᱦᱚᱱ ᱦᱚᱯᱚᱱ ᱡᱟᱦᱟᱸ ᱛᱤᱥ ᱠᱚ ᱧᱮᱞ ᱧᱟᱢ ᱢᱟ᱾ ᱢᱮᱫ ᱤᱛᱠᱤᱫ ᱯᱷᱟᱨᱪᱟ ᱠᱟᱛᱮ ᱠᱟᱹᱢᱤ ᱦᱚᱨ ᱠᱚ ᱧᱮᱞ ᱧᱟᱢ ᱢᱟ᱾ ᱠᱟᱹᱢᱤ ᱱᱟᱹᱭ ᱠᱷᱚᱱ ᱡᱟᱦᱟᱸ ᱛᱤᱱᱟᱹᱜ ᱫᱟᱜ ᱠᱟᱛᱟ ᱥᱮᱫ ᱦᱚᱸ ᱟᱨᱮᱡ ᱯᱟᱹᱥᱤᱨ ᱠᱟᱜ ᱢᱮ ᱦᱟᱥᱟ ᱦᱚᱸ ᱞᱚᱦᱚᱫ ᱦᱟᱱᱛᱟᱲ ᱠᱚᱜ ᱢᱟ᱾ ᱪᱟᱥᱼᱵᱟᱥ ᱠᱟᱛᱮ ᱦᱚᱱ ᱦᱚᱯᱚᱱ ᱡᱟᱦᱟᱸ ᱛᱤᱥ ᱠᱚ ᱟᱹᱥᱩᱞ ᱵᱟᱲᱟᱜ ᱢᱟ᱾

     ᱦᱚᱲ ᱱᱟᱹᱭ ᱦᱚᱸ ᱟᱨ ᱢᱤᱫ ᱱᱟᱹᱭ ᱠᱟᱱ ᱜᱮᱭᱟ ᱚᱲᱟᱜ ᱨᱮ ᱦᱚᱲ, ᱟᱹᱛᱩ ᱨᱮ ᱦᱚᱲ, ᱦᱟᱴ ᱨᱮ ᱦᱚᱲ ᱯᱟᱛᱟ ᱨᱮ ᱦᱚᱲ, ᱵᱟᱡᱟᱨ ᱨᱮᱦᱚᱸ ᱧᱮᱞ ᱠᱚᱢ ᱦᱚᱲ ᱟᱨ ᱦᱚᱲ ᱜᱮ᱾ ᱢᱚᱴᱚᱨ ᱜᱟᱹᱰᱤ ᱨᱮ ᱦᱚᱲ, ᱨᱮᱞ ᱜᱟᱹᱰᱤ ᱨᱮ ᱦᱚᱲ, ᱫᱟᱜ ᱡᱟᱦᱟᱡᱽ ᱨᱮ ᱦᱚᱲ ᱟᱨ ᱩᱰᱟᱹᱣᱜ ᱠᱟᱱ ᱩᱰᱟᱹᱱ ᱜᱟᱹᱰᱤ ᱨᱮ ᱦᱚᱸ ᱦᱚᱲ ᱜᱮ᱾ ᱫᱷᱟᱹᱨᱛᱤ ᱨᱮ ᱦᱚᱲ ᱜᱮ ᱢᱮᱱᱟᱜ ᱠᱚᱣᱟ ᱚᱛ ᱢᱩᱪᱟᱹᱫ ᱠᱚ ᱯᱮᱨᱮᱡ ᱟᱠᱟᱱᱟ᱾

     ᱟᱨ ᱢᱤᱫ ᱞᱮᱠᱟᱱ ᱱᱟᱹᱭ ᱢᱟ ᱡᱩᱣᱟᱹᱱ ᱱᱟᱹᱭ᱾ ᱚᱠᱛᱚ ᱡᱟᱹᱱᱤ ᱥᱟᱱᱟᱢ ᱠᱩᱲᱤᱼᱠᱚᱲᱟ ᱟᱜ ᱦᱚᱲᱢᱚ ᱨᱮ ᱞᱤᱸᱜᱤᱜᱼᱟ᱾ ᱡᱩᱣᱟᱹᱱ ᱨᱮᱱᱟᱜ ᱱᱟᱹᱭ ᱦᱚᱲᱢᱚ ᱨᱮ ᱞᱤᱸᱜᱤ ᱞᱮᱱᱠᱷᱟᱱ ᱩᱱ ᱡᱚᱦᱚᱜ ᱢᱚᱱ ᱞᱟᱹᱣᱠᱟᱹ ᱚᱦᱚ ᱜᱮ ᱥᱟᱸᱵᱽᱲᱟᱣᱜᱼᱟ᱾ ᱟᱹᱠᱤᱞ ᱰᱷᱚᱨᱟ ᱪᱟᱹᱦᱲᱤ ᱰᱟᱝ ᱥᱟᱵ ᱠᱟᱛᱮ ᱧᱩᱛᱩᱢ ᱞᱮᱠᱟᱭ ᱫᱩᱲᱩᱵ ᱠᱚᱜᱼᱟ, ᱡᱮᱞᱮᱠ ᱞᱟᱹᱣᱠᱟᱹ ᱥᱟᱞᱟᱜ ᱚᱠᱚᱭ ᱪᱚᱭ ᱛᱚᱞ ᱢᱤᱫ ᱟᱠᱟᱫ ᱮ ᱞᱮᱠᱟ᱾ ᱫᱟᱜ ᱨᱮᱱᱟᱜ ᱵᱚᱦᱮ ᱚᱠᱟ ᱥᱮᱫ ᱞᱤᱸᱜᱤᱜᱼᱟ ᱞᱟᱹᱣᱠᱟᱹ ᱦᱚᱸ ᱚᱱᱛᱮ ᱜᱮ ᱟᱹᱛᱩ ᱤᱫᱤᱜᱼᱟ᱾ ᱰᱷᱚᱨᱟ ᱫᱚ ᱥᱟᱭ ᱜᱮᱥᱟᱭ ᱜᱚᱴᱟᱝ ᱠᱟᱹᱢᱤ ᱛᱟᱦᱮᱱ ᱛᱟᱭ ᱨᱮᱦᱚᱸ ᱡᱮᱞᱮᱠ ᱪᱮᱫ ᱠᱟᱹᱢᱤ ᱦᱚᱸ ᱜᱮ ᱵᱟᱹᱱᱩᱜ ᱛᱟᱭ ᱞᱮᱠᱟ ᱞᱟᱹᱣᱠᱟᱹ ᱪᱮᱛᱟᱱ ᱨᱮ ᱫᱩᱲᱩᱵ ᱠᱚᱜ ᱞᱟᱹᱜᱤᱫ ᱜᱮ ᱪᱟᱸᱫᱚ ᱫᱚᱭ ᱵᱮᱱᱟᱣ ᱟᱠᱟᱫᱮᱭᱟ᱾ ᱚᱱᱟ ᱱᱟᱹᱭ ᱨᱮ ᱪᱮᱫ ᱱᱚᱝᱠᱟᱱ ᱫᱟᱲᱮ ᱢᱮᱱᱟᱜᱼᱟ ᱼᱨᱚᱲ ᱨᱚᱦᱮᱫ, ᱵᱚᱨ ᱵᱚᱛᱚᱨ ᱥᱟᱱᱟᱢ ᱞᱮᱠᱟᱱᱟᱜ ᱜᱮᱭ ᱜᱮᱢᱮᱨ ᱜᱤᱰᱤᱭᱟ᱾ ᱮᱱᱛᱮ ᱫᱟᱜ ᱨᱮᱱᱟᱜ ᱫᱷᱚᱨᱚᱢ ᱢᱟ ᱱᱚᱝᱠᱟᱱᱟ ᱼ ᱚᱱᱟ ᱫᱚ ᱞᱟᱛᱟᱨ ᱥᱮᱱ ᱜᱮ ᱞᱤᱸᱜᱤᱱᱟ᱾ ᱡᱟᱦᱟᱸᱭ ᱡᱟᱦᱟᱸ ᱞᱮᱠᱟᱛᱮ, ᱢᱤᱫ ᱫᱷᱟᱣ ᱚᱱᱟ ᱱᱟᱹᱭ ᱫᱟᱜ ᱨᱮᱭ ᱟᱹᱛᱩᱜᱼᱟ, ᱩᱱᱤ ᱫᱚ ᱞᱚᱜᱚᱱ ᱛᱮ ᱵᱟᱭ ᱯᱟᱭᱨᱟ ᱨᱟᱠᱟᱵ ᱫᱟᱲᱮᱭᱟᱜᱼᱟ᱾ ᱱᱟᱹᱭ ᱫᱟᱜ ᱨᱮᱱᱟᱜ ᱵᱚᱦᱮ ᱦᱩᱰᱤᱧ ᱥᱟᱺᱦᱤᱡ ᱜᱷᱟᱹᱭ ᱛᱮ ᱞᱤᱸᱜᱤᱜ ᱠᱷᱟᱱ ᱟᱨ ᱦᱚᱲ ᱦᱚᱸ ᱢᱚᱱᱮ ᱡᱤᱣᱤ ᱜᱚᱴᱟ ᱠᱟᱛᱮ ᱛᱟᱭᱚᱢ ᱢᱟᱲᱟᱝ ᱵᱟᱝ ᱵᱮᱸᱜᱮᱫ ᱠᱟᱛᱮ ᱟᱨ ᱵᱟᱝ ᱩᱭᱦᱟᱹᱨ ᱟᱹᱪᱩᱨ ᱠᱟᱛᱮ ᱚᱱᱟ ᱫᱟᱜ ᱨᱮᱭ ᱫᱚᱱ ᱜᱚᱫ ᱠᱟᱜ ᱠᱷᱟᱱ ᱨᱟᱠᱟᱵ ᱨᱩᱣᱟᱹᱲ ᱟᱹᱰᱤ ᱜᱮ ᱟᱸᱴ ᱜᱮᱭᱟ᱾ ᱚᱠᱟ ᱚᱠᱟ ᱡᱚᱦᱚᱜ ᱫᱚ ᱚᱱᱠᱟᱱ ᱦᱚᱲ ᱫᱚ ᱵᱟᱝ ᱠᱚ ᱨᱟᱠᱟᱵ ᱫᱟᱲᱮᱭᱟᱜᱼᱟ᱾ ᱚᱱᱟ ᱱᱟᱹᱭ ᱛᱮ ᱠᱚᱲᱟ ᱠᱚ ᱥᱟᱺᱜᱤᱧ ᱨᱤᱱ ᱵᱮᱯᱟᱨᱤᱭᱟᱹ ᱞᱮᱠᱟ ᱠᱚ ᱦᱤᱡᱩᱜᱼᱟ᱾ ᱥᱟᱺᱜᱤᱧ ᱨᱤᱱ ᱯᱮᱲᱟ ᱢᱚᱱᱮ ᱠᱟᱛᱮ ᱚᱞᱚᱜ ᱠᱩᱲᱤᱭ ᱞᱚᱵᱷᱟᱣᱜᱼᱟ ᱟᱨ ᱟᱡᱟᱜ (ᱠᱩᱲᱤ ᱦᱚᱯᱚᱱᱟᱜ) ᱚᱱᱛᱚᱨ ᱨᱤᱢᱤᱞ ᱨᱮ ᱩᱱᱤ ᱠᱩᱱᱟᱹᱢᱤ ᱪᱟᱸᱫᱚ ᱞᱮᱠᱟ ᱴᱷᱟᱶ ᱮ ᱮᱢᱟᱭᱟ ᱮᱱᱠᱷᱟᱱ ᱩᱱᱤ ᱫᱚᱭ ᱦᱩᱲ ᱚᱪᱚᱜ ᱜᱮᱭᱟ᱾ ᱥᱮᱭᱟᱱ ᱵᱮᱯᱟᱨᱤᱭᱟᱹ ᱠᱚ ᱵᱷᱟᱹᱜᱤ ᱵᱷᱟᱹᱜᱤ ᱡᱤᱱᱤᱥ ᱠᱚᱭ ᱦᱟᱛᱟᱣ ᱵᱟᱲᱟ ᱜᱚᱫ ᱡᱚᱝ ᱟ ᱟᱨ ᱛᱟᱭᱚᱢ ᱵᱤᱫᱟᱹᱞ ᱫᱚᱭ ᱜᱩᱥᱟᱹᱣ ᱡᱚᱝᱼᱟ᱾ ᱪᱮᱫᱟᱜ ᱵᱟᱝ ᱢᱟ ᱵᱮᱯᱟᱨᱤᱭᱟᱹ ᱢᱟ ᱫᱟᱬᱟᱱ ᱦᱚᱲ, ᱦᱟᱱᱛᱮ ᱱᱷᱟᱛᱮ ᱠᱚ ᱫᱟᱬᱟᱱᱟ ᱢᱤᱫ ᱴᱷᱮᱱ ᱢᱤᱫ ᱨᱤᱦᱤᱴ ᱵᱟᱝ ᱠᱚ ᱛᱟᱦᱮᱸ ᱛᱷᱤᱨᱩᱜᱼᱟ᱾ ᱥᱚᱱᱛᱚᱨᱚᱜ ᱢᱮ, ᱩᱱᱤᱭ ᱠᱤᱨᱤᱧ ᱠᱮᱫ ᱢᱮᱠᱷᱟᱱ ᱦᱚᱲ ᱠᱚ ᱠᱟᱹᱲᱢᱤ ᱠᱚ ᱢᱮᱛᱟᱢᱟ᱾

     ᱛᱮᱛᱟᱝ ᱛᱮ ᱚᱠᱟ ᱚᱠᱟ ᱡᱚᱦᱚᱜ ᱫᱚ ᱱᱟᱹᱭ ᱥᱩᱨ ᱛᱮ ᱦᱚᱲ ᱠᱚ ᱦᱤᱡᱩᱜᱼᱟ ᱫᱟᱜ ᱮᱢᱚᱜ ᱫᱚ ᱢᱟᱱᱟ ᱜᱮᱭᱟ᱾ ᱢᱤᱫ ᱵᱟᱨ ᱴᱷᱚᱯ ᱫᱟᱜ ᱫᱚ ᱮᱢ ᱫᱟᱲᱮ ᱟᱭᱟ᱾ ᱢᱮᱱᱠᱷᱟᱱ ᱩᱱᱤ ᱦᱚᱸ ᱥᱟᱶᱛᱟ ᱥᱤᱢᱟᱹ ᱵᱷᱤᱛᱨᱤ ᱨᱤᱱᱤᱡ ᱜᱮᱭ ᱦᱩᱭ ᱠᱚᱜ ᱢᱟ ᱟᱨ ᱫᱟᱜ ᱫᱚ ᱡᱤᱣᱤ ᱵᱟᱧᱪᱟᱣᱜ ᱞᱮᱠᱟ ᱜᱮ ᱮᱢᱟᱭ ᱢᱮ᱾ ᱥᱤᱵᱤᱞ ᱨᱟᱥᱟᱭ ᱧᱟᱢ ᱟᱠᱟᱫ ᱠᱷᱟᱱ ᱥᱩᱞᱩᱠᱚᱜ ᱨᱮᱱᱟᱜ ᱮ ᱨᱤᱠᱟᱹᱭᱟ ᱟᱞᱚᱢ ᱞᱚᱵᱷᱟᱵᱼᱟ᱾ ᱞᱚᱵᱽ ᱫᱚ ᱵᱟᱝ ᱴᱷᱤᱠ ᱜᱮᱭᱟ᱾ ᱧᱩᱨᱩᱜ ᱨᱮᱱᱟᱜ ᱦᱚᱸᱛᱚ ᱵᱚᱛᱚᱨ ᱢᱮᱱᱟᱜᱼᱟ᱾ ᱡᱩᱣᱟᱹᱱ ᱱᱟᱹᱭ ᱫᱟᱜ ᱛᱮ ᱞᱚᱦᱚᱫ ᱦᱚᱨ ᱞᱮᱸᱡᱮᱫ ᱜᱮᱭᱟ᱾ ᱯᱩᱪᱩᱡ ᱮᱢᱟᱱ ᱮᱭᱟᱢᱼᱯᱩᱪᱩᱡ ᱞᱮᱠᱷᱟᱱ ᱮᱢ ᱪᱚᱯᱚᱡᱽ ᱢᱮ, ᱮᱸᱜᱟ ᱠᱟᱹᱴᱩᱵ ᱮ ᱩᱫᱩᱜ ᱟᱢᱟ᱾

     `ᱱᱚᱶᱟ ᱱᱟᱹᱭ ᱫᱟᱜ ᱟᱹᱰᱤ ᱫᱤᱱ ᱫᱚ ᱵᱟᱝ ᱛᱟᱦᱮᱸᱱᱟ᱾ ᱞᱚᱜᱚᱱ ᱜᱮ ᱵᱚᱰᱮ ᱟᱨ ᱟᱸᱡᱮᱫ ᱜᱚᱫᱚᱜᱼᱟ᱾ ᱪᱟᱹᱥᱤ ᱡᱩᱨᱤ ᱥᱟᱞᱟᱜ ᱞᱚᱜᱚᱱ ᱦᱟᱱᱟ ᱱᱷᱟᱶᱟ ᱪᱟᱥ ᱵᱟᱲᱟ ᱡᱚᱝ ᱢᱮ ᱞᱚᱜᱚᱱ ᱞᱚᱜᱚᱱ ᱟᱨᱡᱟᱣ ᱜᱚᱫᱽ ᱢᱮ ᱫᱟᱜ ᱟᱸᱡᱮᱫ ᱞᱮᱱᱠᱷᱟᱱ ᱮᱠᱮᱱ ᱱᱟᱹᱭ ᱟᱸᱡᱮᱫ ᱠᱟᱠᱟᱲᱪᱟᱝ ᱠᱚᱜᱼᱟ ᱵᱚᱛᱚᱨ ᱜᱮ ᱵᱩᱡᱷᱟᱹᱣᱜᱼᱟ᱾

‘ ᱥᱳᱵᱷᱟᱱᱟᱛᱷ ᱵᱮᱥᱨᱟ